Lipotia e le kamupani vaalele a le Ea Niu Sila e $213 miliona le latou polofiti ua maua ina ua toe sologa lelei auaunaga i le felauaina o tagata femalagaa’i.
E 8 miliona pasese na feaveai e le kamupani vaalele i le ‘afa muamua o le tausaga faaletupe talu ai e fua i le piliota lava lea i le tausaga talu ai.
Saunoa le Ofisa Sili Greg Foran o le tali lea o le tolu tausaga o feagai pea le kamupani ma tupe lusi ma o le taimi nei e tele galuega e fia faia pea i nisi o vaega o loo manaomia ona faaleleia ae ua solosolomālie pea ona toe tulaga lelei le auaunaga.
Faailoa e le Ofisa Sili e ono isi vaalele tetele Boeing777 ua toe feoai uma faatasi ai ma isi vaa fou e tolu e feoai i totonu lava o Niu Sila.
Fai mai sa faafaigaluega e le kamupani le 2,000 o tagata faigaluega i totonu o le 6 masina talu ai.
