O le toe tepa i tua i le 21 tausaga talu ona faavae mai le asosi a loia mai le Pasefika i totonu o Aotearoa Niu Sila, e faamemelo le gagana a o talatala mai e nisi o sui faavae o le asosi le tāua ma le atamai o le faatofala’iga na amata fofoa mai ai lenei faalapotopotoga, le asosi o loia a le Pasefika, le Pacific Lawyers Association poo le PLA.
O nisi o sui faavae na latou amata maia lenei faalapotopotoga, sa latou faamatala le tau amatamataga o lenei asosi. Saunoa le tamaitai faamasino, Ida Malosi, o ia o se tasi o sui faavae o le PLA, o lenei asosi e lei faigofie le amataga mai, e lei iloa poo le a faapei le lumanai mo le latou faatofāla’iga, ae sa ia ta’ua o se faigamalaga o le faatuatua (a journey of faith).
Saunoa se tasi loia o lenei asosi, o le amataga o lenei asosi, e tai pei lava o le amataga mai o le sailiga malo a tagata Pasefika; e le malolo ina ua tulaueleele mai lenei atunuu, ae finau malosi e faaauau pea le sailiga malo; e faapena foi le agaga na puaina mai lenei faatofala’iga, e lei nofonofo i se mea e tasi, ae finau malosi ina ia lautele atu le taulau manuia o le asosi.
E tele lu’itau ma suiga eseese i le olaga i nisi o mea na tutupu i totonu o le atunuu, na ui mai ai lenei faalapotopotoga peitai saunoa se tasi o tamaitai loia, o se tasi o sui faavae, Fuimaono Gardenia Atimalala, atonu na fanau mai i se moemitiga ina ia faamaopoopo se asosi a loia uma mai tupuaga Pasefika o loo galulue i totonu o Aotearoa, ina ia uunaia atili ai i nei loia le agaga finau ina ia tumati’e i le galuega faaloia.
O se faatofala’iga ina ia iai se asosi e faamaopoopoina uma fanau loia a le Pasefika, ia avea o se toomaga e sulufai i ai nei fanau loia a le Pasefika pe a moomia se fesoasoani mo le faamalosia atili o latou faanaunauga e sailiili ia ausia uma le maualuga ma le faamanuiaina o loo maua e isi loia a le atunuu.
Na ta’ua ai nisi o loia na latou amata maia lenei faalapotopotoga e pei o le afioga ia Simativa Perese lea ua avea nei ma Faamasino Sili o le Faamasinoga Maualuga a Samoa, le tamaitai faamasino Ida Malosi, lea foi sa avea ma faamasino i le Faamasinoga Maualuga a Samoa i ni tausaga ua tuanai, ma isi loia Samoa, Tonga, Fiti ma isi atunuu o le Pasefika.
O se mafutaga matagofie e le gata ina faamanatu le 21 tausaga talu ona faavae le asosi, ae na maua ai foi se avanoa faaauro e toe feiloai uma ai loia eseese na faavaeina le asosi, ma fanau aoga o loo iai foi le faanaunauga e tuliloaina lenei tomai faaloia.
O le aso o tala malie, o pesepesega, o le talie aemaise foi o le laualo lava e le mafai ona misia i faatasiga faapea a tagata Pasefika.
