E tolu aso o le a faagasolo ai le taamilosaga lakapi taitoafitu a le afioaga o Iva i Savaii lea ua faaigoaina o le Iva Youth sevens. E 21 au o le a tausinio ai i le taamilosaga lenei e amata ile aso Tofi ae maea i le aso Toonai o le vaiaso nei.
E tai tolu au ua vaevae i pulu e fitu e aofia ai ile pulu A au a Moataa, Tepatasi ma Vaigaga. Pulu B o le Laumua o Tumua mai Afega, Marist Rugby Club, ma le Lupe o le So’aga mai Magiagi. Pulu C o le a tausinio ai a Tamauli, Marist St Joseph ma St Mary’s Satitoa. Pulu D o le a taaalo ai Laulii Lions, Lupesiliva mai Sapapalii ma Saleimoa. Pulu E o loo faatulaga mai ai au a le Iva White Lions, SCB Siumu ma Tafitoala.
Pulu F o le a tausinio ai Gataivai, Vaimoso, ma le au a Matautu Gagaifo Youth. O au e tolu i le Pulu G o Malie Sharks, Uso Satalo ma Tama o le Aava. O Moataa o loo umia le siamupini o le taamilosaga lakapi taitoafitu i Iva mai le tausaga ua mavae lea na manumalo ai ile faailogatupe e 15 afe tala.
O le malae o Pelenise Eteuati poo Prince Edward Park i Iva o le a faagasolo ai le taamilosaga ile faaiuga o lenei vaiaso.
