O lea ua faailoa ai e le pulega o tagata tafafao mai i Samoa le maoa’e o le latou faalauiloa poo lana tourism roadshow na faia i Ausetalia talu ai nei, ona ua faaopoopo iai ma le aai o Adelaide.

O le maoa’e foi o lea taumafaiga ona ua faailoa e le pulega i lana faasalalauga faalauiloa masani, e 200 pisinisi tau femalagaa’iga poo travel agents na tali ane e ala i le auai i le latou faalauiloa, lea sa maua ai le avanoa e ave iai faamatalaga uma o nofoaga o mata’aga i Samoa, ma le auaunaga o faletalimalo ma fale apitaga ina ia iloa ai e tagata o lea atunuu ma malaga mai e tafafao i Samoa.

E 30 auaunaga eseese tau i le atina’e o tulisi i Samoa sa malaga o latou sui i le faalauiloa ma o se faitoto’a tāua lea mo i latou e feiloa’i ai ma auaunaga o loo maketiina le atina’e o tulisi i Ausetalia, ma faamautū ai sootaga e galulue faatasi ai mo le faia o tala’iga e faatosina mai ai tulisi tafafao o lea atunuu tele e malaga mai i lo tatou atunuu.

Sa afea foi e le faalauiloa aai tetele o Sini, Melepone, ma Brisbane.

O le auai o le Konesula o Samoa e faamautū i le aai o Sini, faapea nisi o ta’ita’i o auaunaga tuma’oti tau pisinisi tulisi i Samoa i lea faalauiloa, ua faaalia e le pulega o tagata tafafao o se isi lea o itu tāua a o faagasolo le faalauiloa lea ua mae’a, ma ua toe taliu mai i le atunuu le aumalaga sa faatinoina lea faamoemoe.