E lua miliona tala le vaegatupe ua faatatauina i le tala o le tupe o loo taoto nei i le Palemene, i le faamoemoe o le Malo e faaauau ai le polokalame fou o faamanuiaga mo i latou e iai mana’oga tumau.

O se tasi lea o ta’iala sa finau ai le vaega faaupufai o le Faatuatua i le Atua Samoa ua Tasi i le faigapalota tele a le atunuu i le tausaga na te’a nei, ma na faato’ā maua faamanuiaga o tagata e iai mana’oga tumau e agavaa i le fesoasoani i le masina na te’a nei o Me. O lea ua faalua ai nei ona maua i le tala o le tupe autū lona lua ua mae’a folasia e le tamaitai Minisita o Tupe i le Palemene, ma o le a soalaupule e sui usufono i le aso 21 o Iuni.

O le siitaga o le faamanuiaga o le penisione mo le aumatutua e pei ona siitia le 40 tala ma maua ai le 200 tala i le masina e pei ona sa amata faatino lea siitaga i le tala autū muamua o le Tupe mai le masina o Iulai o le tausaga ua mavae e oo mai i le faaiuga o le masina o Iuni o loo savalia nei, ua fuafua ai e le Malo se vaegatupe 33 tesimale 4 miliona mo le penisione a le aumatutua mo le isi tausaga faaletupe fou.

I le fesoasoani na ofo e le faigamalo e totogi ai mea taumafa mo falemai faaitumalo uma i le atunuu o lea ua taofia i le fuafuaga o le tala o le tupe fou, seia vagana le tala autū muamua o le tupe a le faigamalo sa faatino ai lea fesoasoani. O le tala autū muamua lona lua o le tupe e le’i pasia o le uluai fuafuaga tau tupe lea a le faigamalo ua tu i le foe mo le 12 masina o lumanai e amata ia i le masina fou o Iulai.

O lana tala autū muamua o le tupe e na o le 10 masina e mafua ona na faato’ā pasia lea tala o le tupe autū muamua ia Setema o le tausaga na te’a nei, ona o mafuaaga e pei ona silafia le lē mautonu o upufai o le Malo sa iai i le tuanai o le palota tele, ma tuai ai ona tauaofia le Palemene ia Me o le 2021 sa tatau ona faataoto ai le fuafuaga tau tupe ma pasia a o le’i oo i le masina o Iulai e amata ai le tausaga faaletupe fou.