E 38 tausaga o se alii mai le motu tele i Salafai na ioeina ona moliaga o le faia o se faiga aiga faamalosi ma se teineititi laititi o lona lava aiga (niece) ma ua faasala nei i le 19 tausaga e nofosala ai i le falepuipui.
E 12 moliaga o le fai aiga faamalosi (rape) na molia ai lea alii ina ua ia faamalosia lona tei 8 tausaga i nai tausaga ua tuanai.
O le taimi nei ua 11 tausaga o lē na aafia ma o loo i lalo o le puipuiga a le Faalapotopotoga a le Toomaga mo ē Puapuagatia mo lona saogalemu.
I lipoti a le Samoa Global na faailoa ai e le faamasinoga e 9 masina le umi ga tupu mai ai lenei soligatulafono.
O mataupu faapea ua tele ina alia’e mai le aafia ai o teineiti laiti i faiga faamalosi a tagata lava o latou aiga ma e lē vaai maualalo ai le faamasinoga. O le afioga ia Justice Tafaoimalo Leilani Tuala Warren na tuu atu le i’uga ma le faasalaga o lea alii e tuli i le falepuipui i Tanumalala.
