Ua aga’i atu ina atoa le masina talu ona tuli le faasalaga faafalepuipui e 16 masina o Semi Taateo, o se taulealea o Salepoua’e, ina ua ia ioe i le moliaga o le fasioti tagata pa’ivalea.

O lē ua molia ma ua faasalaina e le Faamasinoga Maualuga e tausoga ma lē ua fano le soifua i se vevesi na tupu ia Fepuari o le tausaga nei, o loo faapea mai leoleo na amata e lē ua maliu.

Ua ta’ua i le faai’uga, sa faia se inuga a lē ua molia ma lona tausoga lea sa fai ai tala mālie ma talasua sa taliē ai i la’ua a o fai le la fiafia sa iai ma se isi taulealea o le latou nuu.

O Semi ma lona tausoga ua maliu e lē gata e aiga ae tuaoi o latou fale.

E galulue i le faia o faato’aga e tausi ai o la aiga ma e vavalalata tele le la mafutaga.

O le inuga lea e pei ona faailoa i le faai’uga tusitusia, na lafo ai se tala e lē ua nofosala na to’atāma’i ai lē ua maliu ma amata ai loa le vevesi.

Na taua’ifusu i luga o se sitepu simā ma palalasi ane ai i lalo o le sitepu lea na saofa’i ai lē ua nofosala i le manava o lē ua maliu ma tatu’i foliga.

Na uma alu lē ua molia i lo latou fale ae taoto ai lava lē ua maliu, ae o le taeao o le aso na sosoo ai na ala ane ai Semi ma ia iloa atu o loo taoto mai pea lona tausoga i le nofoaga sa fai ai le vevesi.

Na alu atu iai ma ia vaaia o loo to’a ai se palapala poo le toto i se vaega o le fasitepu simā ae o loo taagulu lona tausoga.

Na ia nanati loa ma ave i le falema’i i Leulumoega lea o loo faailoa e leoleo e le’i leva ona taunuu ae maliu.

O le faasalaga maualuga o le fasioti tagata pa’ivalea pe a faamaonia o le soloatoa, peitai ua ioe le faamasinoga e le’i mafaufauina e lē ua nofosala o le gaioiga na tupu e fano ai le ola o lona tausoga.

Ua talia foi e le faamasinoga le loto ua salamō o Semi i le fano o le soifua o se tasi o lona aiga o se uō mamae sa mafana le mafutaga auā e faifai mea faatasi i le tausiga o o la aiga.

Na teena e le faamasinoga le fautuaga a leoleo e amata se fua o le faasalaga i le 8 tausaga, ae ua amata i le 4 tausaga poo le 48 masina o le faasalaga i le falepuipui.

I le aotelega o le fuaina o lea togisala, na toesea le 2 tausaga ma masina e 8 ona o itu lelei e faasino i lē ua molia, ona totoe ai lea o le tasi le tausaga ma masina e 4 poo le 16 masina e nofo falepuipui ai.

Ua faailoa i le faai’uga e avanoa ona talosaga Semi Taateo mo se iloiloga e magalo ai i tua i le palola pe a mae’a ona tuli le ‘afa o lona faasalaga poo le 8 masina.