Ua amata tuli le faasalaga e 15 tausaga i le falepuipui o se tamā ua 41 tausaga le matua, ua faaipoipo ma e to’avalu ona alo, ina ua faamaonia lona ioeina o moliaga e 6 o le faiaiga faamalosi i ni tama’ita’i se to’alua, o le fanau a le tinā o loo nonofo ma lē ua molia ae ese lo la tamā.
O le tasi o tama’ita’i na aafia i le solitulafono i le 19 tausaga o lona matua, ma o se aafiaga e pei ona faailoa i le faai’uga a le Faamasinoga Maualuga, na taunuu ina ma’itaga ai ma fanau ma ave lana pepe ua vaetama.
O le isi tama’ita’i le uso o le teine matua na aafia i le 15 o ona tausaga.
O le ua nofosala Pasi Aeau ua faamatalaina e lana faifeau o se tagata galue malosi ma e iai ona tomai kamuta, lelei le faifaato’aga ma tautua lelei i le lotu.
Peita’i o lona faia o le solitulafono ma molia ai e leoleo na faasala ai e le nuu.
O nisi ia o itu na aveesea ai nisi o tausaga e 21 na na amata ai le fua o lona faasalaga faapea lona ioeina o moliaga a leoleo.
E ono tausaga ua toesea mai le faasalaga e 21 tausaga i le falepuipui totoe ai le 15 ua nofosala ai lea tama i le toese.
