O le fitu aso ua tuana’i mai le aso 19 i le aso 26 o Iuni na faamauina ai e le soifua mālōlōina i lana lipoti o le vaiaso atoa, e to’a 129 gasegase fou o le Koviti-19 ma ua oo ai le maualuga o le numera o ē ua aafia i lo tatou atunuu i le faama’i i le 14,901.
O aso foi ia e fitu na faamauina ai ma le uluai pepe o se tamaitai na fano le ola i le faama’i ma e leai ni ona gasegase tumau, ma o se uluai pepe ua faamauina le maliu i le Koviti-19 ae e lei agavaa mo se tuipuipui. Ua 29 ai tagata i Samoa ua fano soifua talu ona pesia le atunuu i le faama’i ua faitau miliona ola ma soifua o tagata i le lalolagi ua fano ai.
O le aofa’iga e 14,901 o tagata ua aafia i le faama’i i lo tatou atunuu ua aofia ai tagata malaga mai fafo e 125, ma o lona uiga o le aofa’i o tagata lautele i totonu o Samoa ua aafia e 14,776.
