O le Kolisi o Samoa i Vaivase ma le A’oga Faamasani o Le Amosā ua ausia le 100 pasene o togi ua pasi ai fanau o ia kolisi o le vasega Tausaga 12 na su’e i le tausaga ua mavae i le su’ega e sa’ili ai fanau a le atunuu e ausia le 200 togi poo maka e ulufale atu ai i le vasega faavae o le Iunivesite Aoao o Samoa.
O le Kolisi o Avele ma le Kolisi a Lefaga ua tutusa i le ausia o le 92 pasene o fanau ua pasi foi ma ausia togi e ulufale ai i le vasega faavae i le iunivesite Aoao a le atunuu.
O le Kolisi o Sagata Maria i Vaimoso e 86 pasene, Kolisi o Robert Louis Stevenson e 84 pasene, Kolisi o Maluafou e 82 pasene, sosoo atu iai le Kolisi o Papauta e 80 pasene, ma le Kolisi o le Faatuatua e 79 pasene.
E feoloolo foi le numela o kolisi maualuluga a le malo, o ekalesia o loo ausia lalo ifo o le 70 aga’i ane i le 55 pasene o fanau ua pasi ma ausia togi e 200 mai le matāupu o le gagana peletania ma matāupu lelei e tolu ua agavaa ai ona ulufale i le vasega faavae o le iunivesite aoao a lo tatou atunuu.
Peita’i o nisi o kolisi ma a’oga maualuluga o loo molimauina i faai’uga o su’ega o le SSLC o le tausaga ua mavae le faaletonu ma lē ausia togi e 200.
O fanau ia e tusa ma le 37 pasene o latou togi e i le va o le 199 ma le 120 e agavaa o latou togi ua maua ai le ulufale i a’oa’oga faamatātā eseese lea e ta’ua o le TVET le vocational education training o loo i totonu lava o le iunivesite aoao a Samoa.
E 2,600 fanau sa su’eina le su’ega o le SSLC i le tausaga na te’a nei 2025 mai kolisi maualuluga e 41 i le atunuu e aofia ai kolisi a le malo, ekalesia ma aoga tuma’oti.
O loo maualuga le numela o fanau ua pasi ma ulufale i le iunivesite aoao i lenei tausaga, e faatusa i le maualalo o le numela o fanau na pasi i le su’ega o le SSLC i le tausaga e 2024 lea sa ulufale i le vasega faavae o le iunivesite i le tausaga na te’a nei.
