E 4 auaunaga a le Malo e aofia ai le Matagaluega o leoleo, Loia Sili a le Malo, Ofisa o le Komesina o Sulufaiga ma le Matagaluega a le Palemia ma le Kapeneta, ua molia i se su e tasi le miliona valuselau afe tala ($1.8 miliona) a le afioga Maualaivao Patelesio poo Maualaivao Pat Ah Him.
O le amataga o le vaiaso nei na faaulu atu ai i le faamasinoga maualuga lea mataupu ua talosaga ai le itu tagi mo se taui e mafua i le lē faia e leoleo o lana mataupu o se tagi faasaga i se tamalii o le latou nuu le afioga Maualaivao Pepe Seiuli.
O loo faamatala i le tagi autu vaega uma ua mafua ai lenei finauga faaletulafono ma le taunuuga ua oo nei iai, i le faia o le su ona o mafatiaga ma aafiaga o lē e ana le tagi, e mafua i le lē tausisia e auaunaga a le Malo ua molia, o ala faaletulafono e faatino ai le tagi a Maualaivao Patelesio na faaulu i leoleo, ae mulimuli ane ua molo’aua ma lē faia ni moliaga.
O lē sa avea ma Komesina o leoleo, o lē sa avea ma Minisita o lea matagaluega faapea lē sa avea ma Loia Sili, ma lē sa avea ma Palemia o loo tuuaia foi i ni vaega o lenei tagi.
E lei faamautuina se aso o le a valaau ai mo le taimi muamua i le faamasinoga sili le mataupu.
