O le taeao o le Aso Lua na tuua ai Samoa e le Kovana Sili o Ausetalia ma lona faletua i le mae’a lana asiasiga taualoa muamua i Samoa, ma avea ai foi lo tatou atunuu ma nofoaga e faamautu iai, ma faatino lana asiasiga taualoa mo motu tuaoi o Tonga, Tuvalu ma Kilipati.
O le Aso Lua na tuuvaa ese ai ma faaauau le asiasiga taualoa i le Atu Kuki ma Vanuatu ona toe taliu ai lea i Ausetalia.
O le faletalimalo o le Sheraton i Mulifanua sa faamautu ai le Kovana Sili ma lona faletua ma lana aumalaga, ma o se vaalele o le fitafita a lona Malo sa malaga mai ai i lana asiasiga taualoa.
I se pepa o faamatalaga faalauaitele mai le ofisa o le Komesina maualuga o Ausetalia i Apia, ua momoli mai ai le faafetai a le Kovana Sili i taitai o le Malo o Samoa ona o le tausaafia o lana taligamalo.
O le Aso Sa na tea nei na fai tapuaiga faatasi ai le Kovana Sili o lona faletua ma lana aumalaga ma le afioga i le Ao Mamalu o le Malo ma lana masiofo i le Malumalu o le ekalesia EFKS i Matautu Falelatai.
