O Samoa le uluai atunuu i le lalolagi, ae o se taimi muamua foi lenei ua fai ai e se faigamalo lenei ituaiga o poloketi, lea ua amatamea ai le faigamalo a le Faatuatua i le Atua Samoa ua Tasi (F.A.S.T.).

O se poloketi na tele iai tau matematega i le uluai taimi na faalauiloa ai e le FAST lenei poloketi o se vaega o le latou anavatau a o tapena mo le faigāpalota o le 2021.

Ina ua faatalanoa mai luga o le polokalame a le EFKS TV, le Soalepule, le afioga i le Minisita o Tupe, Afioga Lautimu’ia Afoa Uelese Vaai, na saunoa manino ai le alii minisita, sa ia momolia le poloketi lenei i lana fonotaga talu ai nei ma le Faletupe o le Lalolagi poo le World Bank.

Sa ia faailoa manino na ia faailoa i le World Bank lona confidence i le poloketi lenei a le faigamalo, o le auala lenei poo le means mo le faatupulaia ma le siitia o le tamaoaiga o le atunuu.

O le isi tulaga na ia faailoa i le World Bank, o le poloketi lenei ua mafai ona oooo lava i tagata pito sili ona maulalo le tamaoaiga o le atunuu, ma o se vaega lelei lea na piki mai e le World Bank ma ua iai foi le faatuatuaga o le WB i le poloketi lenei a le faigamalo, ma ua tilotilo ai foi le WB i ni auala e aumai ai sa latou fesoasoani i le uunaia atili o lenei poloketi.

Saunoa Lautimu’ia, na ia faamautinoa i le World Bank, o le poloketi lenei a le faigamalo, e le gata ina faataatia, ae ua faamautinoa foi le faaauau ai pea o lenei polokalame, ma sa ia faailoa foi iai le auala ua faataatia ai vaega mo le faatupeina o lenei poloketi, o se vaega ua matuā faafiafiaina ai le WB.

Sa faaaogā e le afioga i le Minisita lona ia lava itumalo ma aafiaga lelei ua iai aiga o si ona itumalo, talu nei ona faatino lenei poloketi, ua mafai ai e aiga uma aemaise nai aiga limavaivai ona faaauau nisi o vaega na semanu e le mafai ona ausia pe ana lē seanoa lenei faama’ite a le malo, e pei o pili o aoga o nai fanau ma le tele o isi atinae.

E talitonu le minisita, o lenei ua amatamea Samoa i lenei poloketi, ma e ono iai se taimi o le a apo mai foi ma faataitai nisi atunuu i lenei poloketi auā se manuia o tagatanuu uma o se atunuu.

Na toe faamamafa e le alii minisita, o le faaauau ona taulau manuia o lenei poloketi, e faalagolago tele i le lelei ma le faamaoni o le faipule o le itumalo, ina ia mulimulita’i i taiala ua faataatia mai e le malo mo le faagasologa lelei o lenei poloketi.

Saunoa le minisita, ua ready foi le isi miliona mo le tuuina atu i itumalo taitasi, ua na o le faatali lava i le komiti o loo faasoaina mo le taimi e amata faamatuu atu ai, aemaise foi pe afai ua ausia uma vaega o le faaaogāina o le isi miliona ua mae’a ona tuuina atu.