O le vave o gaioiga a se tasi e aumau i le faaitu o Flat Bush na logoina ai leoleo i se taumafaiga e gaoia ni taavale i le faaitu lea e pei ona faailoa e leoleo i se pepa o faamatalaga i le asō.
Fai mai poo le ‘afa o le 11 i le po anapo na maua ai e leoleo le valaau lea ma logo ai i latou o se kulupu o tagata o loo taumafai e gaoia se taavale i luga o Flat Bush School Rd.
Lipotia na sosola ese i latou ia i se isi taavale ae na mulimulitai ai le vaalele helicopter a leoleo ma pueina ai le isi toatolu mai Hollyford Drive ae o le avetaavale ma isi na maua uma i Clendon Park.
Faafetaia e leoleo le vave o le logoina o latou e le tagata na valaau atu ma unaia foi le komiuniti ina ia lipotia atu soo se gaioiga e masalomia i o latou faaitu e mafai ona alofia ai le tulai mai o nisi faafitauli.
O le asō la e tulai ai i le faamasinoga i Manukau se talavou e 18 tausaga le matua e molia i le ulufale faasolitulafono i se taavale ae o le isi talavou e 11 tausaga ma le 13 tausaga atoa ai ma le toatolu o le au tai 14 tausaga le matutua ua tuuina atu i le auaunaga a le Youth Aid.
