O le a faaleaogaina e le faigamalo a Ausetalia le lisi a le Russian Federation mo se nofoaga lona lua o le ofisa o lea atunuu e i autafa ane lava o le maota o le Palemene i Canberra.
O le Palemia o Ausetalia, Anthony Albanese na faia sana feiloaiga ma tusitala i le taeao analeila ma ia faailoa ai lea tulaga ma ua iai nei se aiaiga poo se tulafono o le a faailoa ma pasia i le maota o sui i le asō ma le Senate e tusa o lenei mataupu.
Fai mai le Palemia ua maua e le malo fautuaga manino tau le puipuiga i le tulaga lamatia e iai sea ofisa fou o Lusia i le nofoaga e pei ona talosagaina e lata ane i le maota o le Palemene.
O loo iai pea lava le isi ofisa o Lusia i le atunuu o loo i le faaitu o Griffith ma fai mai le Palemia o loo gaioi nei e faamautu le faaiuga i le mataupu lea ma o le faaiuga ua faia e fua i luga o le saogalemu o le atunuu.
Saunoa le minisita o mataupu faalotoifale, Claire O’Neill o le fanua lea o loo fesiligia e sosoo atu ma le maota o le Palemene ma o le a lē avea o se fanua e faaaoga mo lisi i tulaga faapea ma e le o mautu i le taimi nei le mea o le a faaaoga iai.
