Ua amata le tausaga 2024 i le mataina o le osofai malosi a le auvoli a le Diamonds i liki voli i totonu o Aukilani.
O le ‘au lenei o le Diamonds o alo ma fanau e malaga mai i Samoa ae ua maua le avanoa e agai mai ai ma faalautele le tulaga o le taleni i totonu o lenei atunuu.
O le taamilosaga voli muamua o le 2024 a le Trans Pacfic na siamupini ai le Diamonds ina ua toilalo ai le ‘au malosi o le Tanifa.
O le taamilosaga lona lua o le Auckland Anniversary na manumalo ai foi le Diamonds ina ua malolo ai le Counties Manukau Orcas ma le taamilosaga lona tolu o le Waitangi na toe sao mai i luga le vaa o le Diamonds i le final ina ua faia’ina ai le Tanifa i le la semi-final.
O le sailiga siamupini na toe faaopoopo ai le malosi o le Diamonds i le laua final ma le ACVC ma toe manumalo ai.
Ma o lea ua tulai mai le Diamonds i le tulaga muamua i le sosoo ai o ana manumalo siamupini i taamilosaga voli i totonu o Aukilani.
Ma o se tulaga o loo faafiafiaina ai alo ma fanau mai Samoa ona o loo latou tilotilo i le alualu i luma o le latou taleni talu ona feto’ai ma nisi o ‘au lelei i Aukilani aemaise ai o alo ma fanau o loo iai le lelei atoatoa i le faatinoina o le taaloga voli.
Ina ua mae’a taamilosaga tetele nei e tolu ma ua iai nisi o kalapu ua mafai ona tilotilo i alo ma fanau nei mai i Samoa ina ia mafai ona piki atu ia latou kalapu auā lava le faaaogāina o latou taleni aemaise ai o le tilotilo ai i lo latou lumanai e ala i taaloga.
O loo iai le faamoemoe o le masina fou e toe taliu atu ai nisi o le ‘au i Samoa ona toe fuafua lea i le faaiuga o le tausaga auā le puipuiina o le latou siamupini.
Ae o le aso 24 o Fepuari o le a faia ai le latou sailiga seleni i le fale faafiafia o le Parataiso auā se latou seleni e atinae ai le kalapu.
