Ua amata i le vaiaso nei le faafofogaina o finagalo faaalia i le faamasinoga faavaomalo mo le amiotonu, le International Court of Justice poo le ICJ, e faatatau i matafaioi a atumotu e puipuia ai le tau mai kasa oona.

O se mataupu tāua tele lenei na fofoa mai totonu o se potu a’oga i le Pasefika ae talitonu le to’atele e ono telē sona aafiaga i le finau a le Pasefika e faatatau i suiga o le tau ma ona aafiaga i tagata soifua.

O le mataupu ua oo nei i le ICJ na amata mai i le lima tausaga talu ai i se kulupu o tamaiti a’oga o loo su’esu’eina le tulafono, law students i Vanuatu ina ua o latou faatalanoa ni auala e mafai ai ona fesoasoani i ni gaioiga e faatatau i le tau.

O i latou o tamaiti a’oga i le Iunivesite o le Pasefika i Port Vila i Vanuatu ma tonu ai i lo latou manatu o le a fesili i le ICJ lea e faaigoa o le faamasinoga a le lalolagi, poo le ā so latou finagalo ma ni fautuaga e faatatau i matafaioi a atunuu i le puipuia o le tau mai kasa oona.

Sa o latou sa’ilia le lagolago mai isi atumotu o le Pasefika ma faigamalo ma tuuina atu ai loa le mataupu i le ICJ ma lagolago foi iai Malo Aufaatasi i le tausaga talu ai, o se ulua’i mataupu lea faapea mo le UN General Assembly.

E lata i le 100 atunuu o le a faia folasaga i le 2 vaiaso e fofogaina ai le mataupu i le faamasinoga lea, ma e lua vaega o le a aga’i iai folasaga.

Poo ā matafaioi o atunuu i lalo o le tulafono faavaomalo e puipui ai le tau mai kasa oona o loo alu ane i le siosiomaga, ma le lona lua poo ā tulaga o le a oo iai atunuu ua mafua ai aafiaga tetele i le siosiomaga i le lē usita’ia o matafaioi e ao ona faatino.

O Vanuatu le atunuu e muamua i folasaga ma ua faailoa e sui o le kulupu na aveina le mataupu i le faamasinoga, e ono telē se fesoasoani o le faai’uga e maua mai i le faamasinoga lea mo le aga’i i luma o le finau e faatatau i le tau, aemaise o se faamoemoe foi lea mo atumotu o le Pasefika ua loa tausaga o feagai pea ma mafatiaga mai aafiaga o le siosiomaga mai kasa oona.

Puna o Faamatalaga: https://www.rnz.co.nz/news/world/535329/international-court-of-justice-to-begin-hearings-in-landmark-climate-change-case-started-by-pacific-islander-students