Ua sauni le itu a leoleo e tuuina atu molimau e lagolago ai a latou moliaga e valu ua teena e Aumau poo Mau Hunt, o se taule’ale’a o loo tuua’ia i lona faia o se faasalalauga taufaasese ua faaleaga ai le tulaga ta’uleleia o le kamupani vaalele o le Samoa Airways.
Sa faailoa e lē ua molia i lana faasalalauga i le api o foliga sa aumai i se malaga a le vaalele o le Samoa Airways mai Amerika Samoa ni nakoti poo fualaau faasāina.
O le Aso Lua na valaau ai moliaga a leoleo ma tuuina atu ai e le tamaitai loia o Unasa Iuni Sapolu le tali tetee a lē ua molia i moliaga uma e valu.
O le aso 19 e oo i le aso 22 o Setema o le tausaga nei ua faatulaga e le faamasinoga e su’esu’e ai molimau o lea mataupu tau faamasinoga.
