Ua toe faalogoina foi le valaau mo le faaleleia atili o tulaga tau aoaoga i le saogalemu i luga o vaitafe poo le sami foi aemaise lava mo i latou e malaga mai ma aumau i le atunuu.
Ua toe faalogoina lea valaau i le mae’a o le faalavelave ua malelemo ai ni alii talavou se toalua mai Initia i le matafaga i Piha i le aso toonai na tea nei.
O Neranda Bhana o le peresetene o le asosi a tagata Initia i Niu Sila ua ia ta’ua sa fesootai le asosi ma le ofisa o le Hai Komesina o Initia i le atunuu atoa ai ma aiga ma uo a nai alii ua aafia e le gata i Niu Sila nei ae o Initia foi.
Fai mai Bhana sa fesootai pea ma aiga ina ia faamautinoa o loo lelei le lagolago o loo tuuina iai i nei taimi faigata o le soifuaga.
Fai mai o le toalua o se tasi o alii ua maliu faatoa mae’a atu nei foi ona maliliu lona tamā ma lona tuagane i le Koviti-19 ma ua toatolu ai nei tagata maliliu o lona aiga i se taimi puupuu ina ua toe maliu atu ma lona toalua.
O loo faatino foi le fesoasoani a le ofisa o le Hai Komesina e aofia ai ma le sauni o le toe faafoi atu o ē ua maliliu i Initia ae manatu le toatele o tagata ua alagatatau lava ona faaleleia tulaga tau le aoaoina o tagata i le saogalemu i luga o vaitafe ma le sami.
