Ua faaopoopo pea le aofai o tagata ua valaau mo le faigamalo a Vitoria ina ia mulimulitai i faiga a Niu Sa Uelese ma faaleaogaina loa faasalaga sa faamatuu i tagata i le taimi o vavao o le koviti.
E silia ma le 33 afe faasalaga ia ua aveesea uma e le Revenue NSW ona o le faaiuga a le faamasinoga i se mataupu sa tuuina atu iai ma ua valaau ai tagata i isi setete ina ia faapea foi ona faia e a latou faigamalo.
E lei mautu ane se tali o le mataupu lea mai le faigamalo a Vitoria lea e lei leva atu nei ona toe manumalo ai le premier sa iai muamua Daniel Andrews.
Fai mai le sui premier i le aufaasalalau o loo saili nei se fautuaga mai le loia sili a le setete e tusa o lea mataupu.
