O aafiaga o alii ma tamaitai i Samoa mai le gasegase faigata o le kanesa, o se feau tāua lea i faalauiloa i lenei masina a le sosaiete o le kanesa i Samoa, lea ua faatāua ai pea le lanu piniki i le masina o Oketopa o tausaga taitasi ua faaigoaina o le Pinktober.
O faalauiloa o lea gasegase mo le silafia e lo tatou atunuu o auga o se taumafaiga e le gata o le sosaiete o le kanesa o loo lotolotoi ai, ae o le taulamua ai o le faletupe o le ANZ lea ua sefulu tausaga o faatino i le faamoemoe autu ia talai atu i tagata faamatalaga tāua o le gasegase mo lo latou silafia, ina ia saili atu ai i fomai mo ni suesuega.
O le amataga o le vaiaso na tatala ai faalauiloa o lenei tausaga o faalauiloa o le kanesa, ma sa auai le Minisita o le Soifua Maloloina le afioga Valasi Luapitofanua Toogamaga Tafito Selesele.
O le saunoaga a le Minisita sa ia ave ai le fautuaga i le ituvai o tamaitai, ia faatāua le faia o sailiiliga faafomai e vave iloa ai ua aafia i le gasegase aua e vave togafiti ai le kanesa ma maua ai le puipuiga o le soifua ma le ola mai lea gasegase ua tele soifua ua fano ai.
O le autu o faalauiloa o lenei tausaga, ia tasi i suiga manuia, poo le together we can make a difference.
O le kanesa o le susu poo le breast cancer o loo pito maualuga ai le numera o tamaitai i lo tatou atunuu ua aafia, ma o nisi ua maliliu ai. O le laeiina o le lanu piniki o le faailoga o le lagolago i taumafaiga uma e faasaoina ai le soifua mai le kanesa.
