I le ono masina talu mai Aokuso o le tausaga na tea nei talu ona amata fausia le ofisa tutotonu o le Fono Faavae a le Itumalo o Gagaemauga Numera Tasi i lo tatou motu o Savaii, na alu alu le galuega feagai ma lu’itau i le siitia maualuga o le tau o oloa faufale.
Na to’a ai le galuega mo ni nai masina e pei ona faaalia e le sui faipule o le itumalo le afioga i le Sui Palemia, Tuala Tevaga Iosefo Ponifasio, ina ua ia folasia le tala o le galuega i le tatalaina o le ofisa tutotonu i le Aso Toonai na tea nei.
Na toe talosagaina le Komiti o le poloketi o le tasi le miliona tala mo se isi vaegatupe e 150 afe e fesoasoani i le 200 afe tala na faamatuu muamua mo le fausia o ofisa tutotonu, ma faatotoga ai i mea a fale manaomia, ma totogi o le aufaigaluega ma mafai ai ona faaauau le galuega ma taunuu i le tau e 270 afe tala.
Se vaega o le tala o le galuega na saunia e le taitaifono o le komiti o le Fono Faavae a le itumalo o Gagaemauga Numera Tasi, le afioga foi i le faipule ma le Sui Palemia, le afioga Tuala Tevaga Iosefo Ponifasio.
O sui mai afioaga o le itumalo na latou ooti le lipine e tatala aloaia ai le ofisa tutotonu ae o le Minisita o Tina ma Tamaitai Atinae o Afioaga ma Agafesootai, na saunoa i le tāua o le fuafuaga a le Malo i le poloketi o le tasi le miliona tala.
Le Minisita o loo taiulu i le poloketi tasi le miliona tala, afioga Leota Lamositele Sio.
