I le 276 afe tala o le foa’i mai le polokalame fesoasoani a le Malo o Iapani na toe fausia ma faaleleia ai le falea’oga tulagalua o le afioaga o Mulifanua, o lea ua patipatia e le ulua’oga o le komiti ma le nuu le galuega ua fetaui ma le toe a’e o fanau mo le kuata tolu faaletausaga o a’oa’oga.
Sa iai foi ma le sao o le nuu i le faatupega o le isi lea o aiaiga o le fesoasoani a lea Malo ma o le Aso Faraile na te’a nei na umusa ai le falea’oga, ua faaopoopo ai potu e tolu ma fausia ai ma se maota o se hall, auā meaai a le a’oga tulagalua a Mulifanua. E iai le talitonuga o le Malo o Iapani o le tuuina atu o seleni mo le faaleleia o falea’oga o se teugatupe tāua lea o le a fua mai i alo ma fanau o le atunuu i le lumanai pe a lelei fale mo a’oa’oga.
Ua savalia nei le 31 tausaga o le polokalame fesoasoani a Iapani talu mai le tausaga e 1991, ua fausia ai ma toe faafou le tele o falea’oga e lē gata o a’oga maualuluga a o a’oga tulagalua i nuu ma afioaga o le atunuu. O le fesoasoani foi a lea Malo ua sulufa’i iai komiti a a’oga pe a iai se faamoemoe o le a fausia ni galuega ma faafou falea’oga mo le faaaogāina e fanau ma faia’oga.
