Na umi se taimi o tū tū i luga o lana taavale ua tafea, ma e faafetai o le ola.
A o sau ai lipoti anapo o lologa i Canterbury ma e toatele ua aveesea faamalosi mai o latou fale, o le alii na tafea lana taavale e latalata i Darfield i Sisifo o Kalaiesetete, na faatoa laveaiina i le vaveao analeila e ala i le fesoasoani a tagata laveai, o leoleo faapea ai ma sui na o atu i taavale ambulance.
Ua lipotia e le Herald i le taeao nei, o lea sa taumafai lea alii e pasia le vaitafe peitai na faafuaseia ai loa ona tafea i le malosi o le aave seia oo ai ina amata magoto.
E tusa ma faamaumauga a le vaega o le vaaitau, e silia ma le tasi le masina le mamafa o timuga na pa’ū i le tele o vaega o Canterbury ananafi ma o lea na sau ai lapataiga o timuga mamafa e oo mai i le taeao nei.
E ese mai i timuga mamafa o lea foi na lipotia mai le malosi o le toulu o le aisa anapo i nisi o vaega o Canterbury, ma e iai auala e oo mai i le taeao nei o loo tapunia pea atoa ma fautuaga e tatau ona faapuna vai a o lei taumafaina.
