Ua maua e suesuega e ui i le malilie o faigamalo mo le silia ma le 50 tausaga e fau fale lelei i Niu Sila, ae pagā lea e le o lava.
O lea ua faailoa mai e le Human Rights Commission ananafi faaiuga o suesuega na faia faapitoa i fale i totonu o le atunuu ma e lua tausaga na tuufaatasi mai ai lenei iloiloga.
Ua maua o le toatele o tagata o loo nonofo pea i fale ua pologā toe lē mafanafana ma ua moomia le toe teuteu o tulafono i Niu Sila ma faatū se isi pulega e na te mataituina maketi tau fale.
Fai mai le komisi ua mae’a talanoa ma minisita, peitai o le tali na aumai e le o tutusa lipoti ma faamaumauga.
Ae mai le taitai o le ACT, David Seymour, o le toe faia o se isi pulega e tusa ma le finagalo o le komisi o le maimauga o le taimi ma tupe.
E le fou i le faalogo a le ACT le mataupu ua laga mai e le komisi ma o le komisi lava foi lea e tasi ua leva ona manao Seymour ua tatau ona tapuni.
Ae mai le Renters United, o loo lagolagoina e le faalapotopoga le manatu o le komisi e faia se isi pulega e vaaia le maketi o fale i Niu Sila ona o lea le itu, o lea lava e o faatasi le taumafai ia fau fale faapea ma le maua mai o se polofiti.
