O se aso ese ananafi i Aukilani i le tau fai omai faatasi uma o uiga felanulanua’I o le tau, mai timu aisa, emo le uila, faititili, timuga mamafa i nisi o taimi ma savili malolosi.
Aafia le tele o femalagaa’iga ananafi i Aukilani, mai lava i luga o auala tetele, feoa’iga a vaa i le sami faapea ai ma faigamalaga a vaalele.
O se lipoti mai le Ea Niu Sila e faafā lelei ona taofia lē tumau ana auaunaga i le malaevaalele i Aukilani ananafi ona o le malolosi tele o savili ma ese mai i le 34 faigamalaga i totonu lava ia na o Niu Sila na faalēaogāina, e 3 ana vaalele na taia i le emo o le uila a o iai i luga o le ea, ma na toe faia uma siaki e inisinia a le kamupani vaalele ina ia faamautinoa mai ai o loo saogalemu pea mo feoa’iga.
I faigamalaga lava a vaalele, o lea na tele ina omai taamilomilo i luga o le malaevaalele i Aukilani mo sina taimi ona e lei mafai ona tulaueleele i le po anapo ma umi ai se taimi o iai pasese faapea le aufaigaluega i luga o nei faigamalaga.
Na faatuai ai foi ona tulaueleele se tasi o faigamalaga na sau mai Samoa.
E latalata i le itula e 8 anapo ae sau lipoti mai le ofisa o le tineimu ua lē mafai ona tali le tele o manaoga e valaau atu i le telefoni mo se fesoasoani ona o laau toulu e mafua lava i uiga loulouā o le tau ma o lea na faamuamua lava aiga o loo maualuga le lamatia.
O savili malolosi na lapataia ai le itu i Matu o le atunuu o loo faamoemoe e faaauau mai pea i le taeao nei.
Puna o Faamatalaga: NZ Weather Chat: Planes hit by lightning, others circle airport as strong winds lash Auckland | Stuff
