“Ua soli le vā”. O le upu lena na faailoa e le Afioga Aupito sa ia ta’ua ina ua talanoa atu ia i latou o loo i le matagaluega e fitoitonu i ai le faafitauli lea ua toe tulai mai.
Saunoa Su’a i lana faatalanoaga i luga o le Radio Samoa i le taeao nei, o se gaioiga ua matuā lē talafeagai ma ua toe solia ai le vā lelei lea ua uma ona faalelei ma teu le vā o Niu Sila ma le Pasefika.
O le mau a le matagaluega, o loo soli e tagata le tulafono o le ova o aso e tatau ai ona nonofo faatulafono i totonu o Niu Sila, peitai na saunoa Aupito, ae iai lava auala talafeagai e faatalanoa ai lena faafitauli, nai lo le toe aapa e faatino nei ituaiga osofaiga ua uma ona faatoese le malo ma ta’utino e lē toe faia.
E pei ona silafia o le mataupu lenei i nisi o faatinoga o uiga lē magafagafa poo faiga faamanu na faatino e leoleo ma le matagaluega o femalagaa’iga i aso ua tuana’i i tagata sa ova aso e nonofo ai i Niu Sila poo overstayers, na fai ai a latou osofaiga faavaveao (dawn raid) i fale o aiga ma faaaogā taifau e saili ai tagata.
O le faafitauli na matuā ogaoga i lagona o tagata aemaise lava i tagata Samoa ma isi o latou uso Pasefika, ae i le taimi o le nofoaiga a le tamaitai Palemia ia Jacinda Ardern, na faatino ai loa se faatoesega aloaia a le Malo Niu Sila, ina ua pulou le tamaitai Palemia i le ie o le malo, e fai ai o ia ma sui o le Malo Niu Sila e faailoa le agaga maulalo ma le faatoesega a le malo i se gaioiga sese ma le faailoga tagata sa faatino e Niu Sila i o latou uso Pasefika i lena vaitau.
Peitai o le toe tulai mai o lea gaioiga e pei ona tupu i le vaiaso nei ina ua faia se osofaiga faavaveao a leoleo ma sui o le matagaluega i se aiga o se tagatanuu Tonga, o lea la ua toe lagalagā ai lagona o tagata Pasefika.
Ma o le tulai mai o lenei mataupu i lenei vaiaso, ua maua ai foi i nisi lipoti, o lea lava sa faaauau pea ona faatino i nisi foi tagatānuu o loo ova aso i Niu Sila nei.
Saunoa Aupito o le a faia se feiloaiga taeao ma le tamaitai pule o le Immigration NZ ma, e manatu Su’a e tatau ai ona toe alu le tamaitai pule e fai sana ifoga i nai tagata Tonga.
