Ua moomia e iuni se gaioiga vave a le Auckland Transport a o lei oo i se tulaga e fasiotia ai se avepasi.
O le talosaga lea ananafi a iuni e lua, New Zealand Council of Trade Union ma le First Union i le mae’a sau ai o le tala o le tatui (tulou) o le avepasi i Mt Roskill i le afiafi o le Aso Toonai faatoa mavae atu.
Ua moomia ai e le iuni le tu malosi mai o le Auckland Transport e ala i le faamautinoa o loo lelei meapueata i luga o pasi.
E le gata i lea o le faatonuga o loo faasāsā ai ona tele se fesootaiga a le avepasi ma le pasese e le manao e faaaoga le Hop Card, ma o se tasi mafuaaga e toe tuliloa ai e tagata avepasi ma osofai.
Fai mai se finagalo o iuni, e le o toe iai se taimi mo ni talanoaga ae ua moomia se gaioiga vave ona e le gata o le saogalemu o avepasi ae e le o faigofie foi o lea e tausu’e ni avepasi.
I tala a le Newshub o loo tali mai ai le Auckland Transport ma faailoa mai, o loo galulue nei ma leoleo i suesuega ma o lea foi o loo iai meapueata i luga o pasi.
