Ua iai le tala fiafia mo tagata Aukilani i le mae’a ausia o le maliega i le va o le malo faapea lana puleganuu, lea ua fai mai ai ua leai se siitaga o pili o le suavai 25.8% na tuu e faia i se taimi mulimuli mai o lenei tausaga.
O lea ua toe oosi ese lea fuafuaga ina ua mae’a feutagai le puleganuu ma le malo ma na ta’ua e le Palemia Christopher Luxon ananafi a o iai faatasi ma le pulenuu o Aukilani, Wayne Brown i Magele, o le taunuuga manuia lea o le galulue faatasi o itutino nei e lua.
O le 25.8% siitaga o pili o le suavai o lea na aumai i totonu e le pulega o le suavai a Aukilani le Watercare peitai o le Local Water Done Well ua aumai e le malo e suia ai le Three Waters a le faigamalo faatoa uma atu, ua pa’ū mai ai i le na o le 7.2%.
O se taimi o i luma ona faaofi lea o lenei pili fou i le maota mo lona faatulafonoina.
O suiga foi ua iai nei, o le a faatumauina ai pea le pulea e le puleganuu o le Watercare, peitai o ana aitalafu o le a lē i lalo lea o tusi a le puleganuu ma e lē toe faatupeina foi e le puleganuu.
O se maliega o le a faamāmā avega i pili o le suavai a aiga Aukilani.
Puna o Faamatalaga: Aucklanders’ Watercare bills to rise by 7.2 per cent, not 25.8 per cent, after Government strikes deal with council – NZ Herald
