O se faanoanoaga tele i tagata Wairoa le toe foi o le helikopa a le Palemia ananafi ona o uiga louloua o le tau.
O le toe pa’ū ai o le timu na le mafai ai ona tulaueleele le helikopa na malaga atu ai Chris Hipkins ananafi, ma o lana malaga lea na faapea o le a oo ai e vaai i mea ua faaleagaina.
O se faanoanoaga tele i tagata nei ua pei ua leai se faamoemoe, ma o la latou augani i le malo, e aua nei galo i latou.
O tagata Wairoa ua tele ina leai ni fale, e oo i fanua ua na o palapala to’a ma ua molimau ai le toatele i tala a le Newshub ua matuai leai lava ma se mea o totoe.
O lea sa faatalitali mai Wairoa e faatalosaga i le Palemia mo se tupe, ona ua moomia tele e tagata se tupe e toe faatulai ai Wairoa.
O la latou molimau, e tele talanoaga ma fuafuaga ua iai nei ae a aunoa ma se tupe mai le malo, e faia fua.
E oo mai i le taeao nei, e le o manino pe toe iai se isi malaga a le Palemia i Wairoa, ae afai foi ae iai o lona uiga e faatali seia lelei le tau.
