E le o faataitai Niu Sila ia Amerika lea ua faia le latou faaaliga mo tagata Saina e malaga atu i le malo tele, e tatau ona faailoa e negative le test o le koviti a o lei faatagaina e malaga.
Ua faailoa e sui o le soifua maloloina i le aso pei ona lipotia e le Newshub, o tagata malaga mai Saina i Aotearoa o le a lē manaomia ona faailoa lea tulaga.
Ua faia mai le faasilasilaga a Amerika ae o loo mataitu foi e isi atunuu e pei o Iapani ma Initia le siitia maualuga o le aofai o le au gasegase i le koviti i Saina.
O le faamatalaga mai le Soifua Maloloina a Niu Sila e faapea ua mae’a ona o latou faatino suesuega o tagata malaga mai i le atunuu ma o loo tulaga lelei pea aiaiga o loo iai i le taimi nei.
O se faaiuga o loo lagolago foi iai le epidemiologist o Michael Baker mai le Iunivesite o Otago lea fai mai a ia o le auala e puipui ai le atunuu mai le aumaia o variants fou, o le faaitiitia lea o le aofai o tagata aafia.
