Ua lē lavavā e nisi o loo aumau i se tasi magaala o Melepone ona onosaia gaioiga a se tasi alii o loo feta’ua’ina le faatamaia ai o taavale e 43 i totonu o le 30minute i se mataupu na tulai mai i le tausaga na tea nei.
O le asō ua lipotia mai ai ua silasila nisi o i latou sa faaleagaina a latou taavale i le mataupu lea i le tuuina o se pili i lē na faatinoina lea gaioiga aua e le taugofie totogi e toe faaleleia ai taavale sa faaleagaina.
Fai mai leoleo i Vitoria o ituaiga amioga faapea e matuai le manuia ma e le manaomia.
E talitonu leoleo o se alii pe ā ma le 30-35 tausaga o se alii papalagi na faatinoina lea gaioiga ma ua faamatuu nei lona ata i le komiuniti e fesoasoani i le sailiga.
Fai mai lipoti sa soona faaleaga solo e lea tagata taavale sa paka i magaala ia o Powlett, Albert, Simpson ma Grey Streets i le va o le ‘afa o le 3 ma le 4 o le vaveao o le aso 13 o Tesema i le tausaga na tea nei.
E leai ni mea na gaoia ae na faaleagaina le tele o taavale.
