Ua agai nei Amerika Samoa i le CODE RED ina ua faamaonia le maua ai o nisi o le atunuu i auga o le koviti19.
E lei faailoa se aotelega o le mafuaaga o le aafia ai o tagata o lea atunuu peitai o le sui faigaluega a le Soifua Maloloina e galue i nofoaga faanofoesea poo le MIQ worker sa galue i le taunuu atu o le malaga mai Honolulu i le Aso 27 o Ianuari lea e to’a 35 le pasese na faamaonia le aafia lea e talitonu ua aafia ai ma lea tagata faigaluega i le Koviti ma e toafitu sui o lona aiga ua faamaonia foi le aafia.
Ripotia mai e le Talanei ua faailoa e le Soifua Maloloina o nisi o lea aiga sa auai atu i se sauniga lotu i le Aso Sa i Leone. I se feiloaiga ma Tusitala i le po anapo i luga o le KVZK TV na ave ai le faamalosiau a le Kovana Lemanu Peleti Mauga ina ia galulue faatasi mo le saogalemu
“E manaomia le tatou galulue faatasi. Le paia o le atunuu i Ekalesia. Paia o le atunuu i afioaga ma nuu. Aemaise foi le faigamalo, ia tatou galulue faatasi ina ia aua lava, aua lava bro afaina se soifua i lenei faama’i”.
Taua e Lemanu o le a tapunia Amerika Samoa mo le tasi le vaiaso e aofia ai aoga, o Matagaluega uma a le Mālō ma Faalapotopotoga Tumaoti seia vagana ai i latou e manaomia le latou tautua poo essential workers.
