Ua lima nei aso talu ona faamānavaina ana galuega ina ua valaau le Matai Sili i se tasi o tamalii o le atunuu sa tautua i le Matagaluega o Leoleo ma Falepuipui seia oo ina avea ma faauluuluga poo le Komesina o leoleo, le afioga Saunoamaalii Sonny Schuster, i le 94 o tausaga o lona soifua.
O se taitai sa tulai i le tofiga Komesina o leoleo mo le umi e 11 tausaga lea na amata i lea tulaga faaleoleo maualuga i le tausaga e 1978 e oo i le tausaga e 1989.
O le Aso Tofi ua mavae, 25 o Aperila na tuumalo ai le afioga Saunoamaalii Sonny Schuster.
O ia na toatolu iai Komesina na filifilia e vaaia le matagaluega o leoleo ma falepuipui ina ua tuanai le taimi o le Komesina le susuga Alfonzo Phillip Louis ma se tasi o tamalii le afioga Lavea Unasa Lio Edmond Schmidt ma Sir Angus Sharpe.
Ina ua malolo litaea le afioga Saunoamaalii Sonny Schuster na sosoo atu i le tofiga komesina o leoleo le tofa Samau Timani Samau, faapea Galuvao Tanielu, le afioga Asi James Blakelock, Papalii Lorenese Neru, Lilomaiava Fou Taioalo, ma Fuiavailili Egon Keil.
O se tasi o tulafono na tu malosi le afioga Saunoamaalii ma nisi o leoleo sinia i lea vaitau e teena, o le tulafono na faakonekarate ai le tofiga o le Komesina o leoleo.
O la tetee na faavae i le naunautaiga o ia tamalii ia faatumau le tutoatasi o le matagaluega o leoleo ia lē aafia pe oo iai le malosi o pulega faaupufai o malo poo polokiki.
E lei manuia lea taumafaiga ona ua faatumau pea le finagalo o le Malo sa latou fausia lea tulafono, e pei ona faakonekarate ai nei le taimi galue o le Komesina o leoleo e pei foi o isi faauluuluga o matagaluega ma faalapotopotoga a le Malo.
