Ua amata faaaogā nei e le vaega o loo utuina fagu ea o le okesene mo togafitiga faafoma’i i le maota gasegase i Motootua, se loli fou e ola i le eletise.
O se taavale ua foa’i e le malo o Iapani e ala mai i le vaega o auaunaga tau polokalame o le atina’e a Malo Aufaatasi le UNDP, i lalo o le poloketi o suiga o le tau lea o loo autū i le faaitiitia o kasa kaponi mai fela’ua’iga i le laueleele ma le sami.
E lē gata ina foa’i lea loli fou ae ua aofia ai ma maa e fafaga ai le eletise e ola ai le taavale.
O le Minisita o Galuega Tetele ma Fela’ua’iga a le malo sa ia tauaao atu lea foa’i, ona o le matāgaluega lea o loo faatinoina le poloketi.
O le faia o lea foa’i ua taualuga iai nisi o sauniga sa faagasolo i lenei vaiaso sa faalauiloa ai le ta’iala o le faaaogāina o auala o fela’ua’iga i le eleele ma le sami e ola i le eletise, o se taumafaiga e faaitiitia ai kasa kaponi e pua’ina atu i le osone ma mafua ai le vevela o le lalolagi.
O se tasi o vaega o le poloketi o le a’oa’oina o faia’oga o matātā eseese ina ia latou a’oa’o atu tomai o le inisinia o afi o taavale e ola i le eletise.
E 15 miliona tālā se vaegatupe o lea poloketi o loo maua e Samoa e faatino ai vaega eseese o lea taumafaiga e pei ona faaleleia ai meafaigaluega mo le a’oa’oina o tomai tau inisinia o taavale e ola i le eletise mo a’oga o matātā eseese i le Iunivesite Aoao a Samoa, le Laumua o Puna’oa, ma le Don Bosco.
