O le The Cause Collective poo le TCC ma le Alliance Health Plus o le a tuufaatasi a la auaunaga ina ia faamalosia atili ai le auaunaga mo le mamalu o le atunuu i le tulaga tau le soifua manuia ma le soifua mālōlōina o tagata Pasefika ma komiuniti i Aukilani i Saute.
I se pepa o faamatalaga mai le ta’ita’ifono, o ia auaunaga ua ta’ua ai o le faamoemoe ina ia faamalosia, faatulaga ma kilivaina auaunaga mo le Pasefika, Maoli ma komiuniti i Aukilani i Saute.
O le aso muamua o Tesema o le tausaga nei ua fuafua e faalauiloa aloaia ai lea tuufaatasiga i lalo o le faailo a le TCC ma pe a ma le 100 le aufaigaluega o le a galulue ai i lenei faalapotopotoga fou o le a faamautu i ofisa o le TCC i Manukau.
Ua faailoa foi i le pepa o faamatalaga mai le ta’ita’ifono, Uluomatootua S Aiono, o le ofisa sili o lea faapotopotoga fou o le tamaitai o Rachel Enosa, o se tasi foi sa faauluulu iai le AHPlus i se taimi ua tuanai.
