Ua faia e leoleo moliaga o le ave taavale faatamala ua mafua ai ona manunu’a ni tagata, ma le ave taavale faatamala faasaga i le Minisita o le Matagaluega o Alamanuia, Pisinisi ma Leipa, le afioga Faleomavaega Titimaea Tafua, e mafua i se faalavelave tau taavale i le faai’uga o le vaiaso na te’a nei.
O le Aso Toonai na tupu ai lea faalavelave tau taavale i se vaega o le alatele i le aga’i i Le Mafa Pass, ma na aafia ai se isi taavale ma faamanu’alia ai nisi sa malaga ai.
Na faaalia e le Komesina o leoleo i se avanoa na maua mo tusitala i le aoauli o le Aso Gafua o lenei vaiaso, o loo aafia foi le Minisita i ni manu’a o loo tau savali ai i le falema’i i le taimi nei.
O le molia o lea Minisita o le Kapeneta, e iai le talitonuga o le a faasee tuagalu mai le tauaveina o ona tiute faaminisita ae tālia le taunuuga o lona faamasinoga e pei ona faatulaga o le aso 29 o le masina lenei o Aperila e tula’i ai mo le valaauga muamua poo le firtst mention.
Ua to’alua i le afioga Faleomavaega Minisita o le Kapeneta ua aafia i ni moliaga tau taavale afi i le paeaiga lenei a le Palemene.
O le Minisita o Puna’oa Faalenatura ma Siosiomaga le afioga Toesulusulu Cedric Schuster, na faasee tuagalu foi mai le tauaveina o le tofi minisita ae alo i lona faamasinoga e pei ona sa ia ioeina moliaga e tolu tau taavale afi ma faasala tupe ai.
Na talia e le faamasinoga le talosaga a lana loia e faapafala se faasalaga e aunoa ma le faamaonia o ni moliaga, lea na toe faaulufale ai i le Kapeneta ma faaauau lona tofi minisita.
O le isi o sui faipule o loo taoto nei nei i le faamasinoga ona moliaga o le susuga Laauli Leuatea Poalataivao Fosi Schmidt, lea na faamuta e le Palemia lona tofi minisita o Faato’aga ma Faigafaiva ona o ia moliaga tau soligatulafono.
