Ua valaau mai le malo o Niu Sila i tagata Kiwi o loo i Lepanona, e tuua nei loa ona ua lē saogalemu.

Ae mo i latou o loo fuafua e faimalaga i Lepanona, ia aua ne’i o.

I luga o le upega tafailagi a le SafeTravel a le malo o le lapata’iga lea ua aumai, ma o loo manino ai foi e leai se fesoasoani a le malo e faafoi mai ai tagata mai Lepanona auā o lea e lē o iai se amepasa o Niu Sila i lea atunuu.

I se faamaoniga mai le matagaluega o le va i fafo o lea e 18 tagata Kiwi o loo maua i le lesitala o loo i totonu o Lepanona e oo mai i le aso ananafi.

O se lapata’iga ua sau a o leai ai se filemu i Sasae Tutotonu, lea ua sosoo lava le fasiotia o le sui sinia o le Hamas i Iran faapea ai foi ma le sui o le Hezbollah lea na fasiotia i Lepanona i le amataga o le vaiaso.

Puna o Faamatalaga: ‘Leave now’: Travel warning for New Zealanders in Lebanon (1news.co.nz)