Ua tuu mai i luma le aso e aloaia ai le feagaiga o fefaataua’iga saoloto i le va o Niu Sila ma Peretania.
O le tala lata mai lea mai le malaga a le Palemia, Chris Hipkins a o iai i Peretania ma i saunoaga a le Palemia o se feagaiga faaauro ua atagia ai le mafanafana o le mafutaga a atunuu e lua.
O lea ua tuu mai i le aso 31 o le masina lenei o Me, e mafai ai ona ulufale oloa faatau atu a Niu Sila i Peretania e aunoa ma se tiute e totogi.
E tusa ma le $37 miliona i le tausaga tupe faasao a tagata faipisinisi a Niu Sila mai lenei suiga ma o le a siitia ai foi le GDP poo Gross Domestic Product a Niu Sila i le oo atu i le $1 piliona ma faalautele oloa e faatau atu i Peretania i le silia ma le 50%.
O oloa e iai le uaina, honey, aano o manufasi faapea figota o le sami o nisi nei o oloa e faatau atu i fafo a Niu Sila o le a penefiti ai.
