Ua silia ma le tausaga talu ona molia le taulealea o Aquinas Latulipe i se solitulafono ogaoga o le fasioti tagata pa’ivalea sa molia faatasi ai ma lona uso, lea na tuu avanoa iai le faamasinoga e lē nofosala ae na o lona uso na faasala i le falepuipui.
O lona nofo vaavaaia ai mai lea faai’uga na faafalepuipui mo le tasi le masina i lona soli o aiaiga na nofo vaavaaia ai.
Peita’i o lea ua toe ulufale i faitoto’a o le toese i Tanumalala mo le umi e 12 masina le alii o Aquinas ina ua faamaonia isi ona moliaga i le solitulafono o le talepefale ma le gaoi.
O ia moliaga na māfua ina ua ulufale faamalosi le taulealea i le nofoaga o le oloa siiatoa a Ah Liki ma ia toesea ai ni oloa e tusa lo latou tau ma le tasi le afe selau valusefulu tālā.
Ua 22 tausaga o Aquinas o se alii talavou sa vaetama e se tasi o lona aiga ma ulufale ai i le kolisi o James Cook i Niu Sila.
Na toe foi mai i Samoa ona ua ma’i manatu e fia toe foi mai i lona aiga i Samoa.
E nofosala nei o ia ua fai lona aiga e to’alua lana fanau.
