I le oo mai ai o faamatalaga ma gaioiga faatupu faalavelave na aafia ai le to’atele o tagatānuu Iutaia i Ausetalia, o lea ua tuuina atu nei upu faamafanafana ma upu faalaei’au a le alii Palemia o Niu Sila, Christopher Luxon mo Ausetalia a o feagai ai ma taimi faigatā.
Tuu atu foi faamafanafanaga i auaiga Iutaia uma ua aafia, ma ua motusia faafuase’i mafutaga ma ē pele ia i latou.
Ta’ua foi e Luxon i lana tautalaga, o ia gaioiga faatupu faalavelave ua na o ni faatinoga ua atagia ai le ita ma ua faia lava ma le lē fefefe.
Ma ua tutū faatasi Niu Sila e tetee atu i gaioiga faasolitulafono uma nei.
Faalia e le Palemia o le faamanatuina o le Hanukkah, o se taimi fiafia ma taimi o le filemu a e lē o le tigā ma le loto faavauva.
Na māua foi le auai atu o Christopher Luxon ma le sui palemia ia David Seymour i se sauniga faapitoa a sui o tagatānuu Iutaia i Aukilani ma molimauina ai lo la tutuina ai o moliga’o a o faatautaia lea sauniga faapitoa, e manatua ai ē ua ma’umau soifua i Ausetalia, ae o se faailoga o le tutū faatasi ma tagata Iutaia i le lalolagi atoa.
Puna o Faamatalaga: https://www.facebook.com/share/r/1BrGPwcWxJ/
