Ua lē fiafia le kamupani vaalele a le Ea Niu Sila i le toe sau foi o le isi uta o suauu mo vaalele e leaga foi.
E le o le taimi muamua lenei ua taunuu mai ai suauu faapitoa mo vaalele e le mafai ona faaaoga e pei foi ona iai le uta na taunuu i Aukilani i le masina o Novema.
O le Aso Lulu talu ai na taunuu ai i Ueligitone le isi uta ma ona e leaga o lea na faatapulaa ai i le na o le 80% suauu utu i vaalele pe a faatusa i le maualuga e masani a’i.
Fai mai ai le Board of Airline Representatives o se faafitauli e foliga mai o le a faaauau ai pea.
Fai mai le Ea Niu Sila e tusa ma lipoti a le Newshub o le faatolu ai lea ona taunuu mai o suauu o vaalele ua leaga, ma ua tāpā ai e le kamupani vaalele se faamalamalamaga pe aisea.
O se mataupu o loo vaavaai nei foi iai le matagaluega o pisinisi ma galuega.
