E iai se mataupu o loo finauina nei i le faamasinoga e aofia ai se ulugalii mai Kalaiesetete na o la maua se vaegatupe e 232 afe i le fā’alo o le la fale i le 2021 ma ua manana’o nei e talosaga mo le tupe lea ina ia tuuina atu ia i laua.

Lipotia e le Herald o le tupe na tuu atu e le ulugalii i leoleo i le taimi na maua ai peitai la ua lipotia i le vaiaso nei e talitonu leoleo o lea tupe e lē taumate e aofia i ni faatauga fualaau faasāina o lona uiga e tatau ona alu i leoleo ona o tupe e maua mai soligatulafono.

Ua tuuina e se faamasino o le Faamasinoga Maualuga se poloa’iga e taofia ai le tupe lea ae e tatau ona finauina e le ulugalii lea le la mataupu i le faamasinoga a leai o le a tuuina se poloa’iga e faalēaogāina ai.

Saunoa se tasi o loia sa faatalanoa e le Herald e uiga i le mataupu lea, e pei o faigofie lava le faaupuga faaperetania, ‘Finders Keepers’ pe o lē na te maua na te taofia, peitai e lē o le tulaga lea e iai i mea uma.

Na ia ta’ua o le taimi nei ua iai le poloa’iga a le faamasinoga i le tupe ma ua taofia se’ia finauina lelei e le ulugalii le mataupu a leai o le a tuuina o se meatotino a le Crown.

Saunoa le loia o le faai’uga lava o le a sau mai le faamasinoga ae na ia ta’ua foi e lē o iai se mana’omiaga i lalo o le tulafono mo se tagata na te tuuina ai i leoleo ni meatotino latou te mauaina, peitai e to’atele e lagona o le mea tonu lea e ao ona fai.

Puna o Faamatalaga: https://www.nzherald.co.nz/nz/christchurch-cash-in-the-ceiling-finders-keepers-not-always-the-case-lawyer-says/T2TOJCK3OBD4TGXVT7VCJILMO4/