Ua vaaia foi i lenei vaiaso le tumutumu o malaevaalele i le atunuu ma poloka ona ua lipotia le faafefe ane o se solo tetee a tagata faigaluega i malaevaalele ona o se finauga mo le siitia o totogi ma faaleleia vaega mo le faatinoina o o latou tiute.
O le finau a le aufaigaluega a le malaevaalele le airport fire and rescue e faapea o le a agai ese ma galuega i le vaitau pisi o le kerisimasi ma le tausaga fou ma o loo finau mo se siitaga e 15 pasene i o latou totogi i totonu o le tolu tausaga o lumanai ai.
O tagata faigaluega i malaevaalele i Sini, Melepone ma Brisbane lea o loo aofia i le vevesi ae iai le popolega e iu ina faaopoopo atu iai ma isi.
O loo feagai la tagata malaga i le taimi nei ma faafitauli e pei o le uumi o laina e faatali ai mo le checkin, leiloloa o ato poo uta ma le faafuasei ona faaleaogaina mai o faigamalaga aemaise lava i le taimi pisi o le lata i aso malolo o le faaiuga o le tausaga.
E le gata i faafitauli ia i malaevaalele ae ua maitauina foi le siitia maualuga o le totogi o pasese i vaalele mo malaga faavaomalo.
