Na tapunia i le Aso Tofi o le vaiaso nei le toe faaui i tua o suafa o ni sui poo se sui tauva mo le palota laititi a Vaimauga 3, peitai e iai le talitonuga o loo tumau pea suafa o sui tauva e toatolu ua mae’a faalauiloa na faaulu atu i le Aso Tofi ma le Aso Faraile o le vaiaso na tea nei.

O i latou ia o le afioga Feagaimaalii Bruce Toomalatai Utaileuo o le a tauva faatutoatasi, o le afioga Samau Leatigagaeono Solitamalii Timani o le sui faatu mo le vaega faaupufai e puipuia aiātatau a tagata, ma le afioga Lautimu’ia Afoa Uelese Vaai, o le sui tauva o le pati faaupufai o le Faatuatua i le Atua Samoa ua Tasi.

O le aso 23 o Fepuari e faia ai palota muamua mo nisi o tagata palota o le itumalo o le a talosaga ona o mafuaaga e pei ona aiaia i le Tulafono o faigapalota, ae o le Aso Faraile le aso 24 o le masina nei lava o le palota laititi.

E 4 afe 781 tagata ua lesitala ma faamauina suafa i le lola palota a Vaimauga 3.