O loo tumau pea lapataiga tau le soifua maloloina i le faaitu o Ausetalia i Saute a o faaauau ai pea ona aafia i le tau vevela.

Fai mai e oo i le 41 tikeri i le asō le vevela o le tau faapea foi ma taeao ma ae o lei oso ane le la i le taeao ua faamauina ua 27 tikeri le vevela o le ea.

Ua fautuaina tagata ia nonofo i o latou fale ma ia faamālū le fale ma inu tele i le vai.

Ua fautuaina foi le au nofofale ia tapunipuni faitotoa ma faamalama i le taeao po e taofi ai le mālū i totonu o le fale.

O i latou e faigaluega ma lē mafai ona nonofo i le fale ua fautuaina ina ia saili se nofoaga mālū e malolo ai e pei o se nofoaga o le komiuniti, library poo se faletusi poo se taulaga faatau foi.

O tagata matutua e silia ma le tai 75 tausaga faapea pepe ma tamaiti laiti e matele ina lamatia i ia ituaiga tau vevela ma o loo lapatai mai o le a iai se suiga i le aoauli a taeao e faalogoina ai sina mālū o le ea i le setete atoa.