O loo tumau le lagolago a le malo tutoatasi o Samoa i le avea o le teritori o Amerika Samoa ma sui auai atoatoa o le fono a malo o le Pasefika, le Pacific Islands Forum, ma o lea lagolago na amata mai i le tausaga e 2011, na avea ai le teritori ma sui e auai ma mata’itū taualumaga o fono a Ta’ita’i o Malo i tausaga taitasi po’o se Observer.
Na siitia mai lea tulaga i le avea o Amerika Samoa ma sui lagolago poo se associate member o le fono, ae o le fono i le tausaga nei a ta’ita’i o le pasefika na folasia ai e sui o le faigamalo a Tutuila ma Manua i le fono i Palau le tatau loa ona silasila taitai o le pasefika e avea le teritori ma sui auai atoatoa poo se full member.
O Amerika Samoa o se tasi o sui o le fono a ta’ita’i o malo Polenisia le Polynesia Leaders Group, lea o loo iai Samoa o se tasi o sui faavae o lea taupulega o ta’ita’i o malo polenisia.
