Pe ā ma le toatasi mai le toalima tagata o lea lava e lei faafoia pepa faatumu o le tusigaigoa.
O le tusigaigoa a le atunuu o loo ta’i lima tausaga ma fai o lea sa tatau ona faagata i le aso 7 o Mati peitai na toe tuu mai e le vaega o faamaumauga le avanoa ma faaopoopo ai seia oo i le aso 5 o Me ina ia lava le taimi e faatumu ai.
O le vaega lua o galuega a le tusa ma le 2,125 tagata faigaluega mo le tusigaigoa, o le tuliloa lea o tagata e lei faatumuina a latou pepa faatumu ma e oo mai ananafi e tusa ma lipoti ua mae’a asiasiga e 1.8 miliona.
E oo mai foi i le itula e 9 i le taeao ananafi ua foi mai pepa faatumu a le tusa ma le 4.3 miliona tagata.
O le tasi vae tolu o tagata e lei faafoia mai pepa faatumu o tagata Maori ma Pasefika.
O i latou e uma ane le Aso Faraile o le vaiaso fou e lei faafoiina mai o le a tuuina atu ai loa le final notice e faamalamalama ai le faamalosia i lalo o le tulafono o le faatumu o pepa o le tusigaigoa; a leai o le a sala tupe e totogi le $2,000.
Ae mo i latou na aafia i le afā o Gabrielle, o loo tumau pea le vaiaso muamua o Iuni e faagata ai.
