Ua faamaonia mai e le afioga i le Sui Palemia Tuala Tevaga Ponifasio lona tuli ai o se tagata faigaluega mai lona ofisa poo lana Office Assiatant ona ua masalomia lona gaoi o se tupe mai lona ofisa,
I se faatalatalanoaga a Tuala ma le Samoa Observer na ia taua ai na tautino le tamaitai ua tuli nei i lana gaiiga sa fai ma ua molia nei i le lima tagovale poo le gaoi.
E le’i faailoa e Tuala le igoa o lea tamaitai na gaioia le tino i tupe e $950 mai lana ato (laptop bag).
“Ou te faamaonia atu ua tuli le tamaitai sa faigaluega i lo’u ofisa i lona gaioia o se tupe mai la’u ato ma ua molia nei i le gaoi, ua ia tautino foi i lona toesea lea o le $950”.
Na faamaonia mai foi e le Sui Komesina o Leoleo Auapaau Logoitino Filipo ua faaoo atu le tagi a le Sui Palemia faasaga i le mataupu ma o loo galulue foi le vaega IT a leoleo e silasila i le CCTV camera o le ofisa o Tuala e faamaonia ai le tulai mai o lea solitulafono.
E le’i faailoa e leoleo le aofaiga o le tupe sa toesea e lea tamaitai peitai o loo faaauau pea suesuega a le Matagaluega faasaga i lea mataupu.
