Ua tuli le faatonusili o le Matagaluega a le Soifua Maloloina e le Malo ona o ana tala na fai i luga o upega tafailagi.
O le lata 6 i le afiafi ananafi na sau le pepa o faamatalaga o loo taua ai e le Minisita o le soifua maloloina Ayesha Verrall e le o toe iai sona talitonuga ia Rob Campbell ona o le lē iloa tausi le va e tuu ese ai faiga faapolokiki ae ia faaaloalogia lona tulaga tofi o se tagata galue tutoatasi.
Ua fai mai ai ma le Minisita ona o lea ua ia faaaogaina ai le (36) o le tulafono Crown Entities e aveesea mai ai ma lona tulaga faafaatonusili, ma ua aloaia ai lava i lea taimi.
O le ua tuli nei, sa ia upuia fuafuaga a le vaega a le National sa faalauiloa mai i le amataga o le vaiaso faasaga i le Three Waters, ma o ni manatu na ia toe faasalalau faalauaitele i luga o le social media.
Peitai, i le silasila a le Palemia Chris Hipkins na ia faailoa ai i le amataga o le vaiaso, e le tatau fua i le faatonusili ona aiā i mataupu tau polokiki.
Ae e le i sau le faaiuga ananafi e faamalolo Campbell, e le i fia faatoese i le Aso Gafua i ana tala sa fai.
E ui e le o talia e Campbell le faaiuga ua faamalolo ai ia, na ia toe taua ananafi ua uma ona faatoese i le taitai o le National Christopher Luxon faatasi ai ma le Minisita ia Ayesha Verrall.
